کہو مجھ سے مت اپنے جانے کی بات

کہو مجھ سے مت اپنے جانے کی بات

سناؤ نہ پھر رنج آنے کی بات

خدا سے ڈرو اور باتیں کرو

بڑھاتے ہو کیوں جی گھٹانے کی بات

چلے کہہ کے تم ہم کو مت بھولنا

بھلا یہ بھی ہے کوئی بھلانے کی بات

کبھی تو رلا دے ہے اک بات میں

کرے ہے کبھی وہ ہنسانے کی بات

حریفوں کی تعریف مجھ سے نہ کر

سمجھتا ہوں میں یہ چھڑانے کی بات

کوئی کیا سمجھ کر کچھ اس سے کہے

نہ مانے جو اپنے بے گانے کی بات

نہ کہہ بیٹھے رہنا میں آتا ہوں جلد

کہ ہے یہ ہمارے اٹھانے کی بات

چھپائی نہ مجھ سے گئی کیا کہوں

محبت میں تھی جو چھپانے کی بات

ترابؔ اور کیا اس سے زیادہ کہے

سنا دے جو کچھ تھی سنانے کی بات