dekh kar zulf-e-siyah maftun-o-shaida ho gaya

dekh kar zulf-e-siyah maftūn-o-shaida ho gayā

ai dil-e-dīvāna kyā tujh ko ye saudā ho gayā

aql-o-hosh-o-sabr-o-tastīñ ram hue sab ishq meñ

haaye sab sāthī mere bichhḌe maiñ tanhā ho gayā

yaaro merā rañg kuchh us par na aayā ab talak

maiñ to us ke ishq meñ rañgīñ sarāpā ho gayā

kis tarah yaarī se us kī mujh ko be-zārī na ho

āshnā ġhairoñ se ab to yaar merā ho gayā

jūñhī majlis se mire kal uTh gayā vo sarv-qad

jhaT qiyāmat ā-ga.ī aur hashr barpā ho gayā

raat yaañ charchā thā kuchh us kā ki aa vo pahūñchā shoḳh

sab lage muñh dekhne turfa tamāsha ho gayā

chhā gayā āñkhoñ meñ nashsha bhar gayā dil meñ surūr

ġham nahīñ garmī se ḳhālī jām-o-mīnā ho gayā

qum-be-iznī kah ke āshiq ko jalā detā hai vo

qum-be-iznī allāh ejāz-e-masīhā ho gayā

Husn-e-ḳhidmat se huā mahmūd kā pyārā ayaaz

is qadar kī bandagī us ne ki maulā ho gayā

haath un kā chūmte haiñ hote haiñ sab dast-e-bai'

vaah kyā mashā.ikH yad-e-baizā ho gayā

kyā ho agar husn meñ shohrat huī us kī 'turāb'

maiñ to us ke ishq meñ badnām-o-rusvā ho gayā

dekh kar zulf-e-siyah maftun-o-shaida ho gaya

ai dil-e-diwana kya tujh ko ye sauda ho gaya

aql-o-hosh-o-sabr-o-tastin ram hue sab ishq mein

haye sab sathi mere bichhDe main tanha ho gaya

yaro mera rang kuchh us par na aaya ab talak

main to us ke ishq mein rangin sarapa ho gaya

kis tarah yari se us ki mujh ko be-zari na ho

aashna ghairon se ab to yar mera ho gaya

junhi majlis se mere kal uTh gaya wo sarw-qad

jhaT qiyamat aa-gai aur hashr barpa ho gaya

raat yan charcha tha kuchh us ka ki aa wo pahuncha shoKH

sab lage munh dekhne turfa tamasha ho gaya

chha gaya aankhon mein nashsha bhar gaya dil mein surur

gham nahin garmi se KHali jam-o-mina ho gaya

qum-be-izni kah ke aashiq ko jala deta hai wo

qum-be-izni allah ejaz-e-masiha ho gaya

Husn-e-KHidmat se hua mahmud ka pyara ayaz

is qadar ki bandagi us ne ki maula ho gaya

hath un ka chumte hain hote hain sab dast-e-bai'

wah kya mashaikH yad-e-baiza ho gaya

kya ho agar husn mein shohrat hui us ki 'turab'

main to us ke ishq mein badnam-o-ruswa ho gaya