mil gaya ghairon se jhaT humse judai kar gaya

mil gayā ġhairoñ se jhaT ham se judā.ī kar gayā

be-vafā thā jab to aisī bevafā.ī kar gayā

koī is nā-āshnā se āshnā.ī kyā kare

āshnā se apne jo nā-āshnā.ī kar gayā

aañkh auroñ se laḌā.ī pher lī ham se nigāh

sulh jā dushman se kī mujh se laḌā.ī kar gayā

dekh kar raste meñ mujh ko phir gayā katrā ke raah

shoḳh rāh-e-sharm se kyā kaj-adā.ī kar gayā

ham nahīñ karne ke us kī ḳhair-ḳhvāhī meñ qusūr

kyā huā gar ham se vo zālim burā.ī kar gayā

zindagī-o-marg ik a.alam kī us ke haath thī

apne daur-husn meñ vo but ḳhudā.ī kar gayā

jīte-jīte tū kabhī dil se na bhūlegā 'turāb'

chalte-chalte yaar jo mujh se rukhā.ī kar gayā

mil gaya ghairon se jhaT hum se judai kar gaya

be-wafa tha jab to aisi bewafai kar gaya

koi is na-ashna se aashnai kya kare

aashna se apne jo na-ashnai kar gaya

aankh auron se laDai pher li hum se nigah

sulh ja dushman se ki mujh se laDai kar gaya

dekh kar raste mein mujh ko phir gaya katra ke rah

shoKH rah-e-sharm se kya kaj-adai kar gaya

hum nahin karne ke us ki KHair-KHwahi mein qusur

kya hua gar hum se wo zalim burai kar gaya

zindagi-o-marg ek aalam ki us ke hath thi

apne daur-husn mein wo but KHudai kar gaya

jite-jite tu kabhi dil se na bhulega 'turab'

chalte-chalte yar jo mujh se rukhai kar gaya