مل گیا غیروں سے جھٹ ہم سے جدائی کر گیا

مل گیا غیروں سے جھٹ ہم سے جدائی کر گیا

بے وفا تھا جب تو ایسی بے وفائی کر گیا

کوئی اس نا آشنا سے آشنائی کیا کرے

آشنا سے اپنے جو ناآشنائی کر گیا

آنکھ اوروں سے لڑائی پھیر لی ہم سے نگاہ

صلح جا دشمن سے کی مجھ سے لڑائی کر گیا

دیکھ کر رستے میں مجھ کو پھر گیا کترا کے راہ

شوخ راہ شرم سے کیا کج ادائی کر گیا

ہم نہیں کرنے کے اس کی خیر خواہی میں قصور

کیا ہوا گر ہم سے وہ ظالم برائی کر گیا

زندگی و مرگ اک عالم کی اس کے ہاتھ تھی

اپنے دور حسن میں وہ بت خدائی کر گیا

جیتے جیتے تو کبھی دل سے نہ بھولے گا ترابؔ

چلتے چلتے یار جو مجھ سے رکھائی کر گیا