yun dar-e-sarkar raushan hai ziya-daron ke bich

yuuñ dar-e-sarkār raushan hai ziyā-dāroñ ke biich

jaise raushan āsmāñ par chāñd hai tāroñ ke biich

rahmat-e-haq josh meñ aa jā.egī roz-e-hisāb

jalva-farmā dekh kar un ko gunah-gāroñ ke biich

us se baḌh kar hogī kyā ḳhulq-e-mujassam kī misāl

rakh diyā kirdār un kā ā.īna-dāroñ ke biich

kyā kaheñ kūche meñ un ke hosh meñ ham kab rahe

kho ga.e the zehn-o-dil pur-nūr nazzāroñ ke biich

lams jis kā baḳhsh de bujhte diloñ ko zindagī

kaash aa jaa.e masīhā aisā bīmāroñ ke biich

ho nahīñ saktī misāl-e-'azm-e-shabbīrī kahīñ

ik anā kā bāñkpan hai kitnī talvāroñ ke biich

mid.hat-e-shāh-e-do-'ālam kā sharf milnā hī thā

muddatoñ baiThe haiñ 'shāhid' ham bhī fankāroñ ke biich

yun dar-e-sarkar raushan hai ziya-daron ke bich

jaise raushan aasman par chand hai taron ke bich

rahmat-e-haq josh mein aa jaegi roz-e-hisab

jalwa-farma dekh kar un ko gunah-garon ke bich

us se baDh kar hogi kya KHulq-e-mujassam ki misal

rakh diya kirdar un ka aaina-daron ke bich

kya kahen kuche mein un ke hosh mein hum kab rahe

kho gae the zehn-o-dil pur-nur nazzaron ke bich

lams jis ka baKHsh de bujhte dilon ko zindagi

kash aa jae masiha aisa bimaron ke bich

ho nahin sakti misal-e-'azm-e-shabbiri kahin

ek ana ka bankpan hai kitni talwaron ke bich

midhat-e-shah-e-do-'alam ka sharf milna hi tha

muddaton baiThe hain 'shahid' hum bhi fankaron ke bich