yaad aae raat-bhar gesu-e-sultan-e-jamal

yaad aa.e rāt-bhar gesū-e-sultān-e-jamāl

shab-zadoñ ke ghar pe barsā kHuub bārān-e-jamāl

pahuñchī un ke rū-e-anvar par to phir palTī nahīñ

ho ga.ī har ik nigāh-e-ishq qurbān-e-jamāl

anjuman meñ aap kī shams-o-qamar kā tazkira

vo kare rakhtā na ho jo shaḳhs ’irfān-e-jamāl

ḳhud-baḳhud hī jhuk ga.ī fart-e-’aqīdat se jabīñ

ban gayā un kā adab hī aaj darbān-e-jamāl

nazr sab dandān kar ke 'āshiq-e-dil-gīr ne

de diyā ham ko shu.ūr-e-zikr dandān-e-jamāl

tā-qiyāmat chaar yār-e-mustafā kī shakl meñ

jagmagā.eñge diloñ meñ ban ke arkān-e-jamāl

jalva-e-sarkār ne 'shāhid' ujālā kar diyā

baḌh rahā thā dil kī jānib mere fuqdān-e-jamāl

yaad aae raat-bhar gesu-e-sultan-e-jamal

shab-zadon ke ghar pe barsa kHub baran-e-jamal

pahunchi un ke ru-e-anwar par to phir palTi nahin

ho gai har ek nigah-e-ishq qurban-e-jamal

anjuman mein aap ki shams-o-qamar ka tazkira

wo kare rakhta na ho jo shaKHs ’irfan-e-jamal

KHud-baKHud hi jhuk gai fart-e-’aqidat se jabin

ban gaya un ka adab hi aaj darban-e-jamal

nazr sab dandan kar ke 'ashiq-e-dil-gir ne

de diya hum ko shuur-e-zikr dandan-e-jamal

ta-qiyamat chaar yar-e-mustafa ki shakl mein

jagmagaenge dilon mein ban ke arkan-e-jamal

jalwa-e-sarkar ne 'shahid' ujala kar diya

baDh raha tha dil ki jaanib mere fuqdan-e-jamal