dushmanon ke darmiyan bhi KHauf kab zainab mein hai

dushmanoñ ke darmiyāñ bhī ḳhauf kab zainab meñ hai

hazrat-e-shabbīr sā ġhaiz-o-ġhazab zainab meñ hai

bāp-beTe bhaa.ī sab diiñ par nichhāvar kar diye

jazba-e-īsār-o-qurbānī 'ajab zainab meñ hai

kūfiyoñ kī qaid meñ bhī hai sharī’at kā lihāz

is qadar sharm-e-nabī aur ḳhauf-e-rab zainab meñ hai

'ilm-o-taqvā pārsā.ī jo nihāñ zahrā meñ thā

rabb-e-tā'lā kī 'ināyat se vo sab zainab meñ hai

ġhair kī nazreñ zarā apnī taraf uThne na deñ

be-ridā.ī meñ bhī yuuñ pās-e-adab zainab meñ hai

fātima ke misal qurbānī na kyuuñ detīñ bhalā

sar se pā tak fātima kā 'aks jab zainab meñ hai

diin kī ḳhātir ai 'shāhid' sah ke ġham hañste hue

apnā sab qurbān kar dene kā Dhab zainab meñ hai

dushmanon ke darmiyan bhi KHauf kab zainab mein hai

hazrat-e-shabbir sa ghaiz-o-ghazab zainab mein hai

bap-beTe bhai sab din par nichhawar kar diye

jazba-e-isar-o-qurbani 'ajab zainab mein hai

kufiyon ki qaid mein bhi hai shari’at ka lihaz

is qadar sharm-e-nabi aur KHauf-e-rab zainab mein hai

'ilm-o-taqwa parsai jo nihan zahra mein tha

rabb-e-ta'la ki 'inayat se wo sab zainab mein hai

ghair ki nazren zara apni taraf uThne na den

be-ridai mein bhi yun pas-e-adab zainab mein hai

fatima ke misal qurbani na kyun detin bhala

sar se pa tak fatima ka 'aks jab zainab mein hai

din ki KHatir ai 'shahid' sah ke gham hanste hue

apna sab qurban kar dene ka Dhab zainab mein hai