دشمنوں کے درمیاں بھی خوف کب زینب میں ہے

دشمنوں کے درمیاں بھی خوف کب زینب میں ہے

حضرت شبیر سا غیظ و غضب زینب میں ہے

باپ بیٹے بھائی سب دیں پر نچھاور کر دئے

جذبۂ ایثار و قربانی عجب زینب میں ہے

کوفیوں کی قید میں بھی ہے شریعت کا لحاظ

اس قدر شرم نبی اور خوف رب زینب میں ہے

علم و تقویٰ پارسائی جو نہاں زہرا میں تھا

رب تعالیٰ کی عنایت سے وہ سب زینب میں ہے

غیر کی نظریں ذرا اپنی طرف اٹھنے نہ دیں

بے ردائی میں بھی یوں پاس ادب زینب میں ہے

فاطمہ کے مثل قربانی نہ کیوں دیتیں بھلا

سر سے پا تک فاطمہ کا عکس جب زینب میں ہے

دین کی خاطر اے شاہدؔ سہہ کے غم ہنستے ہوئے

اپنا سب قربان کر دینے کا ڈھب زینب میں ہے