naqsh fitrat ne jo ubhaare hain

naqsh fitrat ne jo ubhāre haiñ

kuchh kinā.e haiñ kuchh ishāre haiñ

ham se pūchho bahār-e-jalva-e-dost

ham ne furqat ke din guzāre haiñ

raunaq-e-charḳh dekhne vaalo

kuchh zamīñ par bhī chāñd taare haiñ

tum zamāne ke ho hamāre sivā

ham kisī ke nahīñ tumhār haiñ

jab nazāre na the nigāheñ thiiñ

ab nigāheñ nahīñ nazāre haiñ

ham se zinda thī zindagī kal tak

aaj ham zindagī ke maare haiñ

dekh kar haath Dālnā gulchīñ

ab ye ġhunche nahīñ sharāre haiñ

jin ko aañsū samajh rahe ho 'shakīl'

dil ke TuuTe hue sahāre haiñ

naqsh fitrat ne jo ubhaare hain

kuchh kinae hain kuchh ishaare hain

hum se puchho bahaar-e-jalwa-e-dost

hum ne furqat ke din guzare hain

raunaq-e-charKH dekhne walo

kuchh zamin par bhi chand tare hain

tum zamane ke ho hamare siwa

hum kisi ke nahin tumhaar hain

jab nazare na the nigahen thin

ab nigahen nahin nazare hain

hum se zinda thi zindagi kal tak

aaj hum zindagi ke mare hain

dekh kar hath Dalna gulchin

ab ye ghunche nahin sharare hain

jin ko aansu samajh rahe ho 'shakil'

dil ke TuTe hue sahaare hain