bahaar aai hai gulshan mein wahi phir rang-e-mahfil hai

bahār aa.ī hai gulshan meñ vahī phir rañg-e-mahfil hai

kisī jā ḳhanda-e-gul hai kahīñ shor-e-’anādil hai

ilāhī ḳhair karnā qatl-gah meñ saḳht mushkil hai

udhar bārish hai tīroñ kī idhar zaḳhmī mirā dil hai

sisakte hoñge lākhoñ saiñkaḌoñ be-dam paḌe hoñge

sun ai qāsid yahī achchhā nishān-e-kū-e-qātil hai

na.ī sūrat se mere qatl ko vo aaj aate haiñ

barahna teġh hai ik haath meñ ik haath meñ dil hai

tamāshā dīdanī hai qatl-gah meñ saḳht-jānī kā

idhar maiñ ziist se nādim udhar sharminda qātil hai

lagā.ī teġh muñh pherā chale ye bhī na farmāyā

are o marne vaale ye to kah kyā hasrat-e-dil hai

vo rusvā.ī ko Dartā hai yahāñ hai vasl kī ḳhvāhish

yahī bas ek aafat hai yahī ai ‘shams' mushkil hai

bahaar aai hai gulshan mein wahi phir rang-e-mahfil hai

kisi ja KHanda-e-gul hai kahin shor-e-’anadil hai

ilahi KHair karna qatl-gah mein saKHt mushkil hai

udhar barish hai tiron ki idhar zaKHmi mera dil hai

sisakte honge lakhon sainkaDon be-dam paDe honge

sun ai qasid yahi achchha nishan-e-ku-e-qatil hai

nai surat se mere qatl ko wo aaj aate hain

barahna tegh hai ek hath mein ek hath mein dil hai

tamasha didani hai qatl-gah mein saKHt-jaani ka

idhar main zist se nadim udhar sharminda qatil hai

lagai tegh munh phera chale ye bhi na farmaya

are o marne wale ye to kah kya hasrat-e-dil hai

wo ruswai ko Darta hai yahan hai wasl ki KHwahish

yahi bas ek aafat hai yahi ai ‘shams' mushkil hai