بہار آئی ہے گلشن میں وہی پھر رنگ محفل ہے

بہار آئی ہے گلشن میں وہی پھر رنگ محفل ہے

کسی جا خندۂ گل ہے کہیں شور عنادل ہے

الٰہی خیر کرنا قتل گہہ میں سخت مشکل ہے

ادھر بارش ہے تیروں کی ادھر زخمی مرا دل ہے

سسکتے ہوں گے لاکھوں سینکڑوں بے دم پڑے ہوں گے

سن اے قاصد یہی اچھا نشان کوئے قاتل ہے

نئی صورت سے میرے قتل کو وہ آج آتے ہیں

برہنہ تیغ ہے اک ہاتھ میں اک ہاتھ میں دل ہے

تماشا دیدنی ہے قتل گہہ میں سخت جانی کا

ادھر میں زیست سے نادم ادھر شرمندہ قاتل ہے

لگائی تیغ منہ پھیرا چلے یہ بھی نہ فرمایا

ارے او مرنے والے یہ تو کہہ کیا حسرت دل ہے

وہ رسوائی کو ڈرتا ہے یہاں ہے وصل کی خواہش

یہی بس ایک آفت ہے یہی اے شمسؔ مشکل ہے