naz wo bhi ek muTThi KHak par

naaz vo bhī ek muTThī ḳhaak par

uḌ rahe ho kāġhzī aflāk par

saaf aur shaffāf rakh kirdār ko

ġham na kar jo daaġh hai poshāk par

tanziya bāteñ tumhārī aaj bhī

naqsh haiñ mere dil-e-namnāk par

dar-haqīqat ḳhvāhishoñ ke ghaav haiñ

dosto is dāman-e-sad-chāk par

kyā pata kab dhokā de jaaye tujhe

mat bharosa rakh dil-e-chālāk par

ghūmtā hai mustaqil har aadmī

zindagī bhar zindagī ke chaak par

sar paTaktī haiñ havā.eñ aaj bhī

bebasī se karbalā kī ḳhaak par

daad ke saare khzāne vaar duuñ

'shād' tere lahja-e-be-bāk par

naz wo bhi ek muTThi KHak par

uD rahe ho kaghzi aflak par

saf aur shaffaf rakh kirdar ko

gham na kar jo dagh hai poshak par

tanziya baaten tumhaari aaj bhi

naqsh hain mere dil-e-namnak par

dar-haqiqat KHwahishon ke ghaw hain

dosto is daman-e-sad-chaak par

kya pata kab dhoka de jaye tujhe

mat bharosa rakh dil-e-chaalak par

ghumta hai mustaqil har aadmi

zindagi bhar zindagi ke chaak par

sar paTakti hain hawaen aaj bhi

bebasi se karbala ki KHak par

dad ke sare khzane war dun

'shad' tere lahja-e-be-bak par