ناز وہ بھی ایک مٹھی خاک پر

ناز وہ بھی ایک مٹھی خاک پر

اڑ رہے ہو کاغذی افلاک پر

صاف اور شفاف رکھ کردار کو

غم نہ کر جو داغ ہے پوشاک پر

طنزیہ باتیں تمہاری آج بھی

نقش ہیں میرے دل نمناک پر

در حقیقت خواہشوں کے گھاؤ ہیں

دوستو اس دامن صد چاک پر

کیا پتہ کب دھوکا دے جائے تجھے

مت بھروسہ رکھ دل چالاک پر

گھومتا ہے مستقل ہر آدمی

زندگی بھر زندگی کے چاک‌ پر

سر پٹکتی ہیں ہوائیں آج بھی

بے بسی سے کربلا کی خاک پر

داد کے سارے خزانے وار دوں

شادؔ تیرے لہجۂ بے باک پر