jaane kyun rozgar-e-duniya se

jaane kyuuñ rozgār-e-duniyā se

ham ko vahshat hai kār-e-duniyā se

ḳhvāhishoñ ne jakaḌ rakhā hai hameñ

kaise nikleñ hisār-e-duniyā se

ik na ik din niDhāl ho ke tumheñ

bāhar aanā hai ġhār-e-duniyā se

ham musāfir haiñ āḳhirash ham bhī

jā.eñge rahguzār duniyā se

ab yahī qabr hai tarah maskan

bāhar aa jā ḳhumār duniyā se

ham to duniyā parast haiñ ham kyā

duur rahte madār-e-duniyā se

roz-e-avval se gulshan-e-dil meñ

raunaqeñ haiñ bahār-e-duniyā se

ruuh ko bhī to ġhusl hai darkār

aT ga.ī hai ġhubār duniyā se

'shād' dānista kuchh darīda dahan

haiñ alag kār-o-bār duniyā se

jaane kyun rozgar-e-duniya se

hum ko wahshat hai kar-e-duniya se

KHwahishon ne jakaD rakha hai hamein

kaise niklen hisar-e-duniya se

ek na ek din niDhaal ho ke tumhein

bahar aana hai ghaar-e-duniya se

hum musafir hain aaKHirash hum bhi

jaenge rahguzar duniya se

ab yahi qabr hai tarah maskan

bahar aa ja KHumar duniya se

hum to duniya parast hain hum kya

dur rahte madar-e-duniya se

roz-e-awwal se gulshan-e-dil mein

raunaqen hain bahaar-e-duniya se

ruh ko bhi to ghusl hai darkar

aT gai hai ghubar duniya se

'shad' danista kuchh darida dahan

hain alag kar-o-bar duniya se