sakun muyassar kabhi na aaya mujhe to duniya-e-pur-fitan mein

sakūñ muyassar kabhī na aayā mujhe to duniyā-e-pur-fitan meñ

maiñ jism se bāhar aake ḳhush huuñ mujhe na lauTā mire badan meñ

ravish jahāñ kī badal ga.ī hai na ḳhauf-e-duniyā na ḳhauf-e-mahshar

muravvateñ ab nahīñ diloñ meñ sitam-zarīfī hai bas chalan meñ

to kis liye phir yahāñ pe karte ho zeb-tan ye libās-e-zarīñ

abad tilak jab lahad meñ rahnā hai sab ko miTTī ke pairahan meñ

sab us kī marzī pe munhasir hai vo sūkhī Tahnī meñ jaan Daale

na chhoḌ dāman ummīd kā tū hai jab talak jaañ nahīf tan meñ

mujhe tire tazkire se nafrat sī ho ga.ī thī ye baat sach hai

par ab to ye haal hai ke har pal magan huuñ bas terī hī lagan meñ

hai kitnī lāchār zindagānī ki ba.ad az marg-e-nā-gahānī

tū chaah kar bhī na lauT pā.egā 'shād' is be-bisāt tan meñ

sakun muyassar kabhi na aaya mujhe to duniya-e-pur-fitan mein

main jism se bahar aake KHush hun mujhe na lauTa mere badan mein

rawish jahan ki badal gai hai na KHauf-e-duniya na KHauf-e-mahshar

murawwaten ab nahin dilon mein sitam-zarifi hai bas chalan mein

to kis liye phir yahan pe karte ho zeb-tan ye libas-e-zarin

abad tilak jab lahad mein rahna hai sab ko miTTi ke pairahan mein

sab us ki marzi pe munhasir hai wo sukhi Tahni mein jaan Dale

na chhoD daman ummid ka tu hai jab talak jaan nahif tan mein

mujhe tere tazkire se nafrat si ho gai thi ye baat sach hai

par ab to ye haal hai ke har pal magan hun bas teri hi lagan mein

hai kitni lachaar zindagani ki baad az marg-e-na-gahani

tu chah kar bhi na lauT paega 'shad' is be-bisat tan mein