meri yaadon se juDe log kahan jaenge

merī yādoñ se juḌe log kahāñ jā.eñge

chhoḌkar mujh ko mire log kahāñ jā.eñge

agle vaqtoñ ke suḳhan-var haiñ bahut ḳhuub magar

likhne vaale ye na.e log kahāñ jā.eñge

apne darbār meñ aane ko kahā hai us ne

yaar ham jaise khare log kahāñ jā.eñge

maiñ kisī tarah pahuñch jā.ūñgā manzil pe magar

merī dīvār bane log kahāñ jā.eñge

un ko tash.hīr ke maidāñ se alag hī rakhiye

aisī bātoñ meñ baḌe log kahāñ jā.eñge

jin ko duniyā kī samajh hī nahīñ koī 'at.har'

sochtā huuñ ye bhale log kahāñ jā.eñge

meri yaadon se juDe log kahan jaenge

chhoDkar mujh ko mere log kahan jaenge

agle waqton ke suKHan-war hain bahut KHub magar

likhne wale ye nae log kahan jaenge

apne darbar mein aane ko kaha hai us ne

yar hum jaise khare log kahan jaenge

main kisi tarah pahunch jaunga manzil pe magar

meri diwar bane log kahan jaenge

un ko tashhir ke maidan se alag hi rakhiye

aisi baaton mein baDe log kahan jaenge

jin ko duniya ki samajh hi nahin koi 'athar'

sochta hun ye bhale log kahan jaenge