meri nindon ko uDate hain chale jate hain

merī nīñdoñ ko uḌāte haiñ chale jaate haiñ

raftagāñ ḳhvāb meñ aate haiñ chale jaate haiñ

umr lagtī hai jahāñ qais se majnūñ bante

us meñ ’ujlat jo dikhāte haiñ chale jaate haiñ

is liye duur hī rahtā huuñ masīhāoñ se

ye na.e zaḳhm lagāte haiñ chale jaate haiñ

zulmat-e-shab ko farozāñ to bhalā kyā karte

ham diyā apnā jalāte haiñ chale jaate haiñ

bādbāñ jaise bhī kuchh log haiñ is duniyā meñ

ruḳh havāoñ kā batāte haiñ chale jaate haiñ

āsmānoñ meñ ye uḌte hue bādal 'at.har'

piyās sahrā kī baḌhāte haiñ chale jaate haiñ

meri nindon ko uDate hain chale jate hain

raftagan KHwab mein aate hain chale jate hain

umr lagti hai jahan qais se majnun bante

us mein ’ujlat jo dikhate hain chale jate hain

is liye dur hi rahta hun masihaon se

ye nae zaKHm lagate hain chale jate hain

zulmat-e-shab ko farozan to bhala kya karte

hum diya apna jalate hain chale jate hain

baadban jaise bhi kuchh log hain is duniya mein

ruKH hawaon ka batate hain chale jate hain

aasmanon mein ye uDte hue baadal 'athar'

piyas sahra ki baDhate hain chale jate hain