میری نیندوں کو اڑاتے ہیں چلے جاتے ہیں

میری نیندوں کو اڑاتے ہیں چلے جاتے ہیں

رفتگاں خواب میں آتے ہیں چلے جاتے ہیں

عمر لگتی ہے جہاں قیس سے مجنوں بنتے

اس میں عجلت جو دکھاتے ہیں چلے جاتے ہیں

اس لئے دور ہی رہتا ہوں مسیحاؤں سے

یہ نئے زخم لگاتے ہیں چلے جاتے ہیں

ظلمت شب کو فروزاں تو بھلا کیا کرتے

ہم دیا اپنا جلاتے ہیں چلے جاتے ہیں

بادباں جیسے بھی کچھ لوگ ہیں اس دنیا میں

رخ ہواؤں کا بتاتے ہیں چلے جاتے ہیں

آسمانوں میں یہ اڑتے ہوئے بادل اطہرؔ

پیاس صحرا کی بڑھاتے ہیں چلے جاتے ہیں