shoala mere nalon ka to pahuncha na kahin aaj

sho.ala mire nāloñ kā to pahuñchā na kahīñ aaj

kyuuñ kudne lagā ban ke dhuāñ charḳh-e-barīñ aaj

aa.ī thī sar-e-bazm vo khole hue zulfeñ

sar pīTte haiñ ham ki balā.eñ bhī na leñ aaj

bahzād kā kis tarh se chehra na utartā

maanī ko balā dī tirī tasvīr ne chiiñ aaj

kyā rañj hai kyuuñ baiThī ho ḳhāmosh jo pūchhā

farmāyā tabī'at nahīñ lagtī hai kahīñ aaj

kuchh kahtā hai aur muñh se nikaltā hai tire kuchh

hotā nahīñ qāsid tirī bātoñ kā yaqīñ aaj

dekheñ to mazā lūTtā hai kaun shab-e-vasl

maiñ ghaat meñ baiThā huuñ 'adū zer-e-kamīñ aaj

phir kal to mirā haath hai aur yaar kā dāman

sar se mire Tal jaa.e shab-e-hijr kahīñ aaj

yā hazrat-e-sajjād hai 'shauq' aap kā ḳhādim

kal hashr meñ us ke tumhīñ mālik ho tumhīñ aaj

shoala mere nalon ka to pahuncha na kahin aaj

kyun kudne laga ban ke dhuan charKH-e-barin aaj

aai thi sar-e-bazm wo khole hue zulfen

sar piTte hain hum ki balaen bhi na len aaj

bahzad ka kis tarh se chehra na utarta

mani ko bala di teri taswir ne chin aaj

kya ranj hai kyun baiThi ho KHamosh jo puchha

farmaya tabi'at nahin lagti hai kahin aaj

kuchh kahta hai aur munh se nikalta hai tere kuchh

hota nahin qasid teri baaton ka yaqin aaj

dekhen to maza luTta hai kaun shab-e-wasl

main ghat mein baiTha hun 'adu zer-e-kamin aaj

phir kal to mera hath hai aur yar ka daman

sar se mere Tal jae shab-e-hijr kahin aaj

ya hazrat-e-sajjad hai 'shauq' aap ka KHadim

kal hashr mein us ke tumhin malik ho tumhin aaj