shauq mein ab na rukenge dam-e-raftar qadam

shauq meñ ab na rukeñge dam-e-raftār qadam

duur ab manzil-e-maqsūd ho yā chaar qadam

dasht-e-zindāñ meñ Thaharte nahīñ zinhār qadam

tire kūche ke haiñ har-vaqt talab-gār qadam

ho ga.e kūcha-e-dildār meñ be-kār qadam

maiñ uThātā huuñ par uThte nahīñ zinhār qadam

allāh allāh nazākat se kisī kā chalnā

fitna-e-hashr ne chūme dam-e-raftār qadam

uTh ke aate haiñ bagūle mirī pā-bosī ko

maiñ jo rakhtā huuñ sar-e-vādī-e-pur-ḳhār qadam

ḳhūbi-e-baḳht ki shal ho ga.e paañv mire

rah ga.ī manzil-e-maqsūd jo do-chār qadam

ba-ḳhudā qabr kī ho jā.egī mushkil āsāñ

saath lāsha ke chaleñge jo vo do-chār qadam

ġhair jab tak na nikal jā.egā mahfil se tirī

ham na rakheñge tirī bazm meñ zinhār qadam

allāh allāh mujhe manzil-e-maqsūd kā shauq

sāya-e-tan se nikal jaatā huuñ do-chār qadam

maiñ ḳhafā ho ke jab uThā to vo bole 'kausar'

fitna-e-hashr ne chūme dam-e-raftār qadam

shauq mein ab na rukenge dam-e-raftar qadam

dur ab manzil-e-maqsud ho ya chaar qadam

dasht-e-zindan mein Thaharte nahin zinhaar qadam

tere kuche ke hain har-waqt talab-gar qadam

ho gae kucha-e-dildar mein be-kar qadam

main uThata hun par uThte nahin zinhaar qadam

allah allah nazakat se kisi ka chalna

fitna-e-hashr ne chume dam-e-raftar qadam

uTh ke aate hain bagule meri pa-bosi ko

main jo rakhta hun sar-e-wadi-e-pur-KHar qadam

KHubi-e-baKHt ki shal ho gae panw mere

rah gai manzil-e-maqsud jo do-chaar qadam

ba-KHuda qabr ki ho jaegi mushkil aasan

sath lasha ke chalenge jo wo do-chaar qadam

ghair jab tak na nikal jaega mahfil se teri

hum na rakhenge teri bazm mein zinhaar qadam

allah allah mujhe manzil-e-maqsud ka shauq

saya-e-tan se nikal jata hun do-chaar qadam

main KHafa ho ke jab uTha to wo bole 'kausar'

fitna-e-hashr ne chume dam-e-raftar qadam