tishna-labi ka haal samundar se kya kahen

tishna-labī kā haal samundar se kyā kaheñ

raushan zamīr sāqī-e-kausar se kyā kaheñ

sub.h-e-azal kī kHūbī-o-shām-e-abad kā husn

zulf-e-siyāh-o-rū-e-munavvar se kyā kaheñ

ahl-e-nazar ho koī to us ko dikhā.eñ ham

asrār-e-ishq-e-zāhid-e-ḳhud-sar se kyā kahīñ

rahmat bahāna jo hai shafā.at ke vāste

roz-e-hisāb dāvar-e-mahshar se kyā kaheñ

vo jāntā hai sab mire dil kī kahe baġhair

dil ke muāmlāt ko dil-bar se kyā kaheñ

us ke mazāq-o-fahm se baalā hai ye 'sa.īd'

suufī ke vārdāt ko shā.ir se kyā kaheñ

tishna-labi ka haal samundar se kya kahen

raushan zamir saqi-e-kausar se kya kahen

subh-e-azal ki kHubi-o-sham-e-abad ka husn

zulf-e-siyah-o-ru-e-munawwar se kya kahen

ahl-e-nazar ho koi to us ko dikhaen hum

asrar-e-ishq-e-zahid-e-KHud-sar se kya kahin

rahmat bahana jo hai shafaat ke waste

roz-e-hisab dawar-e-mahshar se kya kahen

wo jaanta hai sab mere dil ki kahe baghair

dil ke muamlat ko dil-bar se kya kahen

us ke mazaq-o-fahm se baala hai ye 'said'

sufi ke wardat ko shair se kya kahen