sheron mein nikhat-e-gesu-e-ali hai

sheroñ meñ nik.hat-e-gesū-e-alī hai

har sher mirā shāna kash-e-mū-e-alī hai

ka.abe meñ ḳhayāl-e-ruḳh-e-nekū-e-alī hai

allāh ke ghar meñ nazar sū-e-alī hai

ye mai nahīñ aks-e-ruḳh naikū-e-alī hai

mai-ḳhāna-e-irfān meñ ravāñ jū-e-alī hai

mauzūnī-e-qāmat yahī kahtī hai pukāre

allāh kā alif qāmat dil-jūī.alī hai

jis miim se bantā hai ahad sūrat-e-ahmad

meñ khul ke ye kah duuñ girah mū-e-alī hai

aate hī mahak uTThe gā sab hashr kā maidāñ

lakhoñ meñ jo chhuptī nahīñ vo bū-e-ali hai

ai arsh bulandī meñ zarā kam nahīñ tujh se

vo masnad-e-dīñ jo tahā zānū-e-alī hai

kaisā sag-e-lailā ki ye hai aur hī vaadī

us najd meñ lailā bhī sag-e-kū-e-alī hai

har ḳhū-e-alī bū-e-nabī kartī hai paidā

ḳhū-bū jo nabī kī hai vahī bū-e-alī hai

qudrat ne ye baḳhshā sharaf-e-ḳhās alī ko

ḳhātūn-e-jināñ fātima bānū-e-alī hai

kahtā hai kise aaj yadullah-e-zamāna

parde meñ nihāñ quvvat-e-bāzu-e-alī hai

hūreñ bhī haiñ ġhilmān bhī nahīñ ḳhuld meñ kyā kuchh

bā.īñ hamā firdaus-e-nazar sū-e-alī hai

ḳhū jis kī ye ho ḳhalq meñ bū phailegī us kī

rahm-o-karam afū-o-atā ḳhū-e-alī hai

khīñchne meñ bhī tanane meñ bhī tasvīr hai us kī

ye teġh do paikar hai ki abrū-e-alī hai

kahte haiñ mahak kar gul-e-mazmūn manāqib

phūloñ meñ 'riyāz' aap ke ḳhushbū-e-alī hai

sheron mein nikhat-e-gesu-e-ali hai

har sher mera shana kash-e-mu-e-ali hai

kabe mein KHayal-e-ruKH-e-neku-e-ali hai

allah ke ghar mein nazar su-e-ali hai

ye mai nahin aks-e-ruKH naiku-e-ali hai

mai-KHana-e-irfan mein rawan ju-e-ali hai

mauzuni-e-qamat yahi kahti hai pukare

allah ka alif qamat dil-juiali hai

jis mim se banta hai ahad surat-e-ahmad

mein khul ke ye kah dun girah mu-e-ali hai

aate hi mahak uTThe ga sab hashr ka maidan

lakhon mein jo chhupti nahin wo bu-e-ali hai

ai arsh bulandi mein zara kam nahin tujh se

wo masnad-e-din jo taha zanu-e-ali hai

kaisa sag-e-laila ki ye hai aur hi wadi

us najd mein laila bhi sag-e-ku-e-ali hai

har KHu-e-ali bu-e-nabi karti hai paida

KHu-bu jo nabi ki hai wahi bu-e-ali hai

qudrat ne ye baKHsha sharaf-e-KHas ali ko

KHatun-e-jinan fatima banu-e-ali hai

kahta hai kise aaj yadullah-e-zamana

parde mein nihan quwwat-e-bazu-e-ali hai

huren bhi hain ghilman bhi nahin KHuld mein kya kuchh

bain hama firdaus-e-nazar su-e-ali hai

KHu jis ki ye ho KHalq mein bu phailegi us ki

rahm-o-karam afu-o-ata KHu-e-ali hai

khinchne mein bhi tanane mein bhi taswir hai us ki

ye tegh do paikar hai ki abru-e-ali hai

kahte hain mahak kar gul-e-mazmun manaqib

phulon mein 'riyaz' aap ke KHushbu-e-ali hai