shishe mein hasin baada-e-gul-fam hasin hai

shīshe meñ hasīñ bāda-e-gul-fām hasīñ hai

mai-ḳhāna-e-islām kā har jaam hasīñ hai

mehrāb kī raunaq hai koī zīnat-e-mimbar

as.hāb-e-mohammad kā har ek naam hasīñ hai

firdaus ke bāġhoñ kī bahāroñ se ziyāda

ārām-gah-e-sāqī-e-islām hasīñ hai

allāh re tanvīr-e-ruḳh-o-zulf-e-mohammad

har sub.h farozāñ hai har ik shaam hasīñ hai

ai salle-alā āriz-e-sāqī kī bahāreñ

mai-ḳhāna munavvar hai har ik jaam hasīñ hai

zulfoñ kā tasavvur salāmoñ kī hai bārish

majbūr ġham-e-ishq kī har shaam hasīñ hai

kaunain ne paa.ī hai 'hayāt' us se tajallī

vo arsh se bhī jalva-gah-e-gām hasīñ hai

shishe mein hasin baada-e-gul-fam hasin hai

mai-KHana-e-islam ka har jam hasin hai

mehrab ki raunaq hai koi zinat-e-mimbar

ashab-e-mohammad ka har ek nam hasin hai

firdaus ke baghon ki bahaaron se ziyaada

aaram-gah-e-saqi-e-islam hasin hai

allah re tanwir-e-ruKH-o-zulf-e-mohammad

har subh farozan hai har ek sham hasin hai

ai salle-ala aariz-e-saqi ki bahaaren

mai-KHana munawwar hai har ek jam hasin hai

zulfon ka tasawwur salamon ki hai barish

majbur gham-e-ishq ki har sham hasin hai

kaunain ne pai hai 'hayat' us se tajalli

wo arsh se bhi jalwa-gah-e-gam hasin hai