na balaon se na aafat se Dar lagta hai

na balāoñ se na āfāt se Dar lagtā hai

ab to apnoñ kī ināyāt se Dar lagtā hai

kyā milā.eñge sar-e-rāh vo nazreñ ham se

un ko duniyā ke savālāt se Dar lagtā hai

ye kahā dil kī taraf dekh ke us ne mere

aise vīrān maqāmāt se Dar lagtā hai

dil tujhe le to chaleñ shahr-e-nigārāñ meñ magar

terī fitrat tirī ādāt se Dar lagtā hai

is liye toḌ dī us ne vo imārat ki use

merī azmat ke nishānāt se Dar lagtā hai

pahle hotī thī kisī baat se dahshat ab to

'soz' duniyā kī har ik baat se Dar lagtā hai

na balaon se na aafat se Dar lagta hai

ab to apnon ki inayat se Dar lagta hai

kya milaenge sar-e-rah wo nazren hum se

un ko duniya ke sawalat se Dar lagta hai

ye kaha dil ki taraf dekh ke us ne mere

aise viran maqamat se Dar lagta hai

dil tujhe le to chalen shahr-e-nigaran mein magar

teri fitrat teri aadat se Dar lagta hai

is liye toD di us ne wo imarat ki use

meri azmat ke nishanat se Dar lagta hai

pahle hoti thi kisi baat se dahshat ab to

'soz' duniya ki har ek baat se Dar lagta hai