hum ko gham-e-hayat ke kanTon pe Dal ke

ham ko ġham-e-hayāt ke kāñToñ pe Daal ke

likhvā.e ham se vaqt ne naġhme kamāl ke

rakh dī ga.ī diloñ se sadāqat nikāl ke

shāyad bahut qarīb haiñ mausam zavāl ke

sachchā javāb ek hī hotā hai mere dost

kitne javāb degā mire ik savāl ke

ham das ke hindise meñ haiñ us ek kī tarah

zero hī baaqī bachtā hai jis ko nikāl ke

'ādat hamesha ghūmte rahne kī hai use

rakhnā qadam zamīñ pe zarā dekh bhaal ke

ab ḳhvāhishoñ ke Dasne kā ronā fuzūl hai

ham ne to ḳhud ka.e haiñ javāñ saañp paal ke

hum ko gham-e-hayat ke kanTon pe Dal ke

likhwae hum se waqt ne naghme kamal ke

rakh di gai dilon se sadaqat nikal ke

shayad bahut qarib hain mausam zawal ke

sachcha jawab ek hi hota hai mere dost

kitne jawab dega mere ek sawal ke

hum das ke hindise mein hain us ek ki tarah

zero hi baqi bachta hai jis ko nikal ke

'adat hamesha ghumte rahne ki hai use

rakhna qadam zamin pe zara dekh bhaal ke

ab KHwahishon ke Dasne ka rona fuzul hai

hum ne to KHud kae hain jawan sanp pal ke