ab to ye aalam hai ghabra kar gham-o-alam se

ab to ye 'ālam hai ghabrā kar ġham-o-ālām se

bhāgtā hai duur insāñ zindagī ke naam se

māñgne vāloñ kī saf meñ aaga.ī aulād shah

aur tum kyā chāhte ho gardish-e-ayyām se

umr bhar kar ke adā har qarz terā zindagī

jhaaḌ kar dāman ko ab baiThā huuñ maiñ ārām se

sūrat-o-sīrat ke andar itnī tabdīlī ke ba.ad

kaun ab degā sadā ham ko hamāre naam se

is zamīn-o-āsmāñ ke darmiyāñ aane ke ba.ad

kyuuñ rahe mahrūm koī dard ke in.aam se

dard kī lazzat to us dam giit meñ paidā huī

aarzū roī lipaT kar jab dil-e-nākām se

ab to ye 'alam hai ghabra kar gham-o-alam se

bhagta hai dur insan zindagi ke nam se

mangne walon ki saf mein aagai aulad shah

aur tum kya chahte ho gardish-e-ayyam se

umr bhar kar ke ada har qarz tera zindagi

jhaD kar daman ko ab baiTha hun main aaram se

surat-o-sirat ke andar itni tabdili ke baad

kaun ab dega sada hum ko hamare nam se

is zamin-o-asman ke darmiyan aane ke baad

kyun rahe mahrum koi dard ke inam se

dard ki lazzat to us dam git mein paida hui

aarzu roi lipaT kar jab dil-e-nakaam se