اب تو یہ عالم ہے گھبرا کر غم و آلام سے

اب تو یہ عالم ہے گھبرا کر غم و آلام سے

بھاگتا ہے دور انساں زندگی کے نام سے

مانگنے والوں کی صف میں آگئی اولاد شہ

اور تم کیا چاہتے ہو گردش ایام سے

عمر بھر کر کے ادا ہر قرض تیرا زندگی

جھاڑ کر دامن کو اب بیٹھا ہوں میں آرام سے

صورت و سیرت کے اندر اتنی تبدیلی کے بعد

کون اب دے گا صدا ہم کو ہمارے نام سے

اس زمین و آسماں کے درمیاں آنے کے بعد

کیوں رہے محروم کوئی درد کے انعام سے

درد کی لذت تو اس دم گیت میں پیدا ہوئی

آرزو روئی لپٹ کر جب دل ناکام سے