nazar ko haal-e-dil ka tarjuman kahna hi paDta hai

nazar ko hāl-e-dil kā tarjumāñ kahnā hī paḌtā hai

ḳhamoshī ko bhī ik tarz-e-bayāñ kahnā hī paḌtā hai

jahāñ har gaam par sajde Tapakte haiñ jabīnoñ se

vahāñ har naqsh-e-pā ko āstāñ kahnā hī paḌtā hai

jahāñ lab koshish-e-iz.hār-e-matlab ko taraste haiñ

vahāñ har saañs ko ik dāstāñ kahnā hī paḌtā hai

agar qalb-o-nazar meñ vus.ateñ huuñ tere jalvoñ kī

ḳhizāñ ko bhī bahār-e-jāvedāñ kahnā hī paḌtā hai

kahāñ āsūdgī dil kī kahāñ afsurdagī lekin

asīrī meñ qafas ko āshiyāñ kahnā hī paḌtā hai

ik aisā bhī maqām aatā hai be-dād-e-mohabbat meñ

ki is nā-mehrbāñ ko mehrbāñ kahnā hī paḌtā hai

ham un se mājrā-e-dard-e-dil kahte nahīñ lekin

ba-andāz-e-hadīs-e-dīgarāñ kahnā hī paḌtā hai

nahīñ be-kār un kā is tarah se muskurā denā

'tabassum' ko bhī ik tarz-e-bayāñ kahnā hī paḌtā hai

nazar ko haal-e-dil ka tarjuman kahna hi paDta hai

KHamoshi ko bhi ek tarz-e-bayan kahna hi paDta hai

jahan har gam par sajde Tapakte hain jabinon se

wahan har naqsh-e-pa ko aastan kahna hi paDta hai

jahan lab koshish-e-izhaar-e-matlab ko taraste hain

wahan har sans ko ek dastan kahna hi paDta hai

agar qalb-o-nazar mein wusaten hun tere jalwon ki

KHizan ko bhi bahaar-e-jawedan kahna hi paDta hai

kahan aasudgi dil ki kahan afsurdagi lekin

asiri mein qafas ko aashiyan kahna hi paDta hai

ek aisa bhi maqam aata hai be-dad-e-mohabbat mein

ki is na-mehrban ko mehrban kahna hi paDta hai

hum un se majra-e-dard-e-dil kahte nahin lekin

ba-andaz-e-hadis-e-digaran kahna hi paDta hai

nahin be-kar un ka is tarah se muskura dena

'tabassum' ko bhi ek tarz-e-bayan kahna hi paDta hai