main haar man lun is ka sawal hai hi nahin

maiñ haar maan luuñ is kā savāl hai hī nahīñ

javāñ hai ruuh badan to niDhāl hai hī nahīñ

na tum ḳhudā ho na ho nāḳhudā na dard na ishq

tum aise ho ki tumhārī misāl hai hī nahīñ

bas aa ke baiTh ga.e sab luTā ke ishq meñ ham

ye vo uruuj hai jis ko zavāl hai hī nahīñ

tumheñ jo pā liyā ab rab se aur kyā māñgaiñ

faqat duā.eñ haiñ lab par savāl hai hī nahīñ

agar batā.eñ to kyā aa.egā kisī ko yaqīñ

hamāre ishq meñ fikr-e-visāl hai hī nahīñ

bahut baḌā to hai bāzār-e-bandagī lekin

pasand rab ko jo aa.e vo maal hai hī nahīñ

ġhazab huā jo khulā rāz-e-bandagī 'kausar'

pata chalā ki harām-o-halāl hai hī nahīñ

main haar man lun is ka sawal hai hi nahin

jawan hai ruh badan to niDhaal hai hi nahin

na tum KHuda ho na ho naKHuda na dard na ishq

tum aise ho ki tumhaari misal hai hi nahin

bas aa ke baiTh gae sab luTa ke ishq mein hum

ye wo uruj hai jis ko zawal hai hi nahin

tumhein jo pa liya ab rab se aur kya mangain

faqat duaen hain lab par sawal hai hi nahin

agar bataen to kya aaega kisi ko yaqin

hamare ishq mein fikr-e-visal hai hi nahin

bahut baDa to hai bazar-e-bandagi lekin

pasand rab ko jo aae wo mal hai hi nahin

ghazab hua jo khula raaz-e-bandagi 'kausar'

pata chala ki haram-o-halal hai hi nahin