lab chup hue to dida-e-tar bolne lage

lab chup hue to dīda-e-tar bolne lage

āñkhoñ ke ashk bār-e-digar bolne lage

ghabrā ke terā naam pukārā thā ek baar

dāman se shab ke nūr-e-sahar bolne lage

thā ba.ad-e-qatl saare ilāqe meñ ik sukūt

phir yuuñ huā ki zaḳhm-e-jigar bolne lage

logoñ ke dard chunñe meñ khoyā ho jab masīh

aise meñ ik salīb agar bolne lage

sha-e-surḳhiyoñ meñ zikr na aayā to ye huā

bastī ke saath kyā huā ghar bolne lage

Dhalke zarā naqāb sar-e-bazm ruḳh se jab

us par ThiThuk ke sab kī nazar bolne lage

rañgoñ kī kyā bisāt ke tasvīr ho sakeñ

'kausar' tumhār dast-e-hunar bolne lage

lab chup hue to dida-e-tar bolne lage

aankhon ke ashk bar-e-digar bolne lage

ghabra ke tera nam pukara tha ek bar

daman se shab ke nur-e-sahar bolne lage

tha baad-e-qatl sare ilaqe mein ek sukut

phir yun hua ki zaKHm-e-jigar bolne lage

logon ke dard chunne mein khoya ho jab masih

aise mein ek salib agar bolne lage

sha-e-surKHiyon mein zikr na aaya to ye hua

basti ke sath kya hua ghar bolne lage

Dhalke zara naqab sar-e-bazm ruKH se jab

us par ThiThuk ke sab ki nazar bolne lage

rangon ki kya bisat ke taswir ho saken

'kausar' tumhaar dast-e-hunar bolne lage