main kHasta-o-ranjida aawara-e-ulfat hun

maiñ kHasta-o-ranjīda āvāra-e-ulfat huuñ

maiñ dūd-e-pareshāñ huuñ bikhrī huī nik.hat huuñ

tū āyat-e-rabbānī tū rahbar-e-vajdānī

aur terī atāoñ kī ik meñ bhī hikāyat huuñ

vīrāna-e-hastī meñ ābād kahāñ kuchh bhī

maiñ us meñ yaqīnan bas terī hī karāmat huuñ

hañgāma-e-duniyā meñ itnā sā hai afsāna

ik shauq kī hasrat huuñ ik dil kī shikāyat huuñ

Thahrāv jab aayā kuchh be-tāb tabī.at meñ

ma.alūm huā kitnī simTī huī vus.at huuñ

hai sajda-gah-e-'ālam naqsh-e-kaf-e-pā terā

masjūd-e-qadam terī maiñ misl-e-shahādat huuñ

'kausar' mirī qismat haiñ bechain tamannā.eñ

Thahrā huā rasta huuñ hotī huī hijrat huuñ

main kHasta-o-ranjida aawara-e-ulfat hun

main dud-e-pareshan hun bikhri hui nikhat hun

tu aayat-e-rabbani tu rahbar-e-wajdani

aur teri ataon ki ek mein bhi hikayat hun

virana-e-hasti mein aabaad kahan kuchh bhi

main us mein yaqinan bas teri hi karamat hun

hangama-e-duniya mein itna sa hai afsana

ek shauq ki hasrat hun ek dil ki shikayat hun

Thahraw jab aaya kuchh be-tab tabiat mein

malum hua kitni simTi hui wusat hun

hai sajda-gah-e-'alam naqsh-e-kaf-e-pa tera

masjud-e-qadam teri main misl-e-shahadat hun

'kausar' meri qismat hain bechain tamannaen

Thahra hua rasta hun hoti hui hijrat hun