میں خستہ و رنجیدہ آوارۂ الفت ہوں

میں خستہ و رنجیدہ آوارۂ الفت ہوں

میں دوو پریشاں ہوں بکھری ہوئی نکہت ہوں

تو آیت ربانی تو رہبر وجدانی

اور تیری عطاؤں کی اک میں بھی حکایت ہوں

ویرانۂ ہستی میں آباد کہاں کچھ بھی

میں اس میں یقیناً بس تیری ہی کرامت ہوں

ہنگامۂ دنیا میں اتنا سا ہے افسانہ

اک شوق کی حسرت ہوں اک دل کی شکایت ہوں

ٹھہراؤ جب آیا کچھ بے تاب طبیعت میں

معلوم ہوا کتنی سمٹی ہوئی وسعت ہوں

ہے سجدہ گہہ عالم نقش کف پا تیرا

مسجود قدم تیری میں مثل شہادت ہوں

کوثرؔ مری قسمت ہیں بے چین تمنائیں

ٹھہرا ہوا رستہ ہوں ہوتی ہوئی ہجرت ہوں