hunar ko aazmana chahti hun

hunar ko āzmānā chāhtī huuñ

maiñ patthar kā zamāna chāhtī huuñ

mujhe ab chāhiye ik zaḳhm taaza

na.ī sham.eñ jalānā chāhtī huuñ

jahāñ bachcha koī bhūkā na so.e

nagar aisā basānā chāhtī huuñ

kaḌe lagte haiñ ab dastūr pichhle

na.ī taḳhtī likhānā chāhtī huuñ

sabhī rāheñ purānī hoga.ī haiñ

nayā rasta banānā chāhtī huuñ

kahāñ maiñ aur kahāñ zauq-e-’ibādat

bas 'arz-e-dil sunānā chāhtī huuñ

uḌā ke Daal se ḳhvāhish kā panchhī

maiñ apnī maiñ miTānā chāhtī huuñ

lagā ke aag hastī kī dukāñ meñ

matā’-e-dil bachānā chāhtī huuñ

uThā.e taaq se aurāq-e-māzī

maiñ phir se muskurānā chāhtī huuñ

hunar ko aazmana chahti hun

main patthar ka zamana chahti hun

mujhe ab chahiye ek zaKHm taza

nai shamen jalana chahti hun

jahan bachcha koi bhuka na soe

nagar aisa basana chahti hun

kaDe lagte hain ab dastur pichhle

nai taKHti likhana chahti hun

sabhi rahen purani hogai hain

naya rasta banana chahti hun

kahan main aur kahan zauq-e-’ibaadat

bas 'arz-e-dil sunana chahti hun

uDa ke Dal se KHwahish ka panchhi

main apni main miTana chahti hun

laga ke aag hasti ki dukan mein

mata’-e-dil bachana chahti hun

uThae taq se auraq-e-mazi

main phir se muskurana chahti hun