KHwab-e-adam se ishq ne hum ko jaga diya

ḳhvāb-e-'adam se 'ishq ne ham ko jagā diyā

āñkheñ khulīñ ki roz tamāsha dikhā diyā

duniyā-o-dīñ ke qabz meñ rahtā thā dil bahut

shukr-e-ḳhudā ki 'ishq ne jhagḌā miTā diyā

aa.e the ham 'adam se ke dekheñge nūr-e-haq

ġhaflat ne aah bhar ke jahāñ meñ sulā diyā

jis vaqt teġh khīñch ke aayā vo gul-badan

mānind-e-ġhuncha ham ne sar apnā jhukā diyā

jo chiiz de chuke use phir māñgte nahīñ

us sham.a-rū ko ham ne dil apnā diyā diyā

sham-e’-azal kā nuur jo raushan huā bahut

fānūs-e-dil meñ us ko ḳhudā ne chhipā diyā

'asġhar' savāl jis ne kiyā thā alast kā

qaalū balā javāb ḳhud us ne sikhā diyā

KHwab-e-'adam se 'ishq ne hum ko jaga diya

aankhen khulin ki roz tamasha dikha diya

duniya-o-din ke qabz mein rahta tha dil bahut

shukr-e-KHuda ki 'ishq ne jhagDa miTa diya

aae the hum 'adam se ke dekhenge nur-e-haq

ghaflat ne aah bhar ke jahan mein sula diya

jis waqt tegh khinch ke aaya wo gul-badan

manind-e-ghuncha hum ne sar apna jhuka diya

jo chiz de chuke use phir mangte nahin

us shama-ru ko hum ne dil apna diya diya

sham-e’-azal ka nur jo raushan hua bahut

fanus-e-dil mein us ko KHuda ne chhipa diya

'asghar' sawal jis ne kiya tha alast ka

qalu bala jawab KHud us ne sikha diya