na hi manzil kahin dekhe na tha rasta ayan apna

na hī manzil kahīñ dekhe na thā rasta 'ayāñ apnā

kahāñ lekar chalā huuñ dekh ye TuuTā makāñ apnā

sulagtī rahguzar be-mehr mausam tishnagī dil kī

magar ye 'ishq phir bhī māntā hai kārvāñ apnā

kabhī jo āñdhiyoñ meñ bhī tirā ban kar khaḌā thā maiñ

tabhī vīrān nagrī meñ jalāyā āshiyāñ apnā

vo jis kī be-ruḳhī ne aaj mujh ko toḌ Daalā hai

usī ke naam kar aayā thā kal tak āsmāñ apnā

kafan tak noch le jaate haiñ duniyā vaale qabroñ se

sajā kar kis liye rakkhā thā ham ne ye jahāñ apnā

na aayā ḳhvāb meñ bhī vo na lauTī chiTThiyāñ us kī

ujaḌ kar rah gayā dil se vafāoñ kā jahāñ apnā

mujhe kuchh fikr thī us kī use kuchh ġham nahīñ merā

miTā kar maiñ hī baiThā thā tasallī kā nishāñ apnā

mire aañsū mirī aaheñ mirī tanhā.iyāñ dekho

kisī din lauT kar aanā yahī hai imtihāñ apnā

miTā Daalā sabhī ne par na miT paayā abhī 'amjad'

likhā rahtā hai har saf.he pe jaise ik nishāñ apnā

na hi manzil kahin dekhe na tha rasta 'ayan apna

kahan lekar chala hun dekh ye TuTa makan apna

sulagti rahguzar be-mehr mausam tishnagi dil ki

magar ye 'ishq phir bhi manta hai karwan apna

kabhi jo aandhiyon mein bhi tera ban kar khaDa tha main

tabhi viran nagri mein jalaya aashiyan apna

wo jis ki be-ruKHi ne aaj mujh ko toD Dala hai

usi ke nam kar aaya tha kal tak aasman apna

kafan tak noch le jate hain duniya wale qabron se

saja kar kis liye rakkha tha hum ne ye jahan apna

na aaya KHwab mein bhi wo na lauTi chiTThiyan us ki

ujaD kar rah gaya dil se wafaon ka jahan apna

mujhe kuchh fikr thi us ki use kuchh gham nahin mera

miTa kar main hi baiTha tha tasalli ka nishan apna

mere aansu meri aahen meri tanhaiyan dekho

kisi din lauT kar aana yahi hai imtihan apna

miTa Dala sabhi ne par na miT paya abhi 'amjad'

likha rahta hai har safhe pe jaise ek nishan apna