KHumar-e-ishq mujhko dam-ba-dam hai

ḳhumār-e-'ishq mujh ko dam-ba-dam hai

mire saaqī kā ye lutf-o-karam hai

zarā qadmoñ pe apne dekhiye to

shikasta-dil mirā zer-e-qadam hai

na pūchho 'ishq kī duniyā meñ hai kyā

yahāñ bas karb hai hijr-o-alam hai

ye dāġh-e-dil bhī degī jaañ bhī legī

rah-e-ulfat sarāpā pur-sitam hai

basā hai dil meñ jab se vo sitamgar

fuġhāñ hai dard hai aur chashm-e-nam hai

koī jaa.e to un se laa.e dil ko

churā ke le gayā merā balam hai

na koī ham-navā nā koī hamdam

tumhārā aasrā bas ai sanam hai

brā-e-'āshiqāñ ātish harāmast

kitāb-e-'ishq meñ naql-o-raqam hai

nahīñ aa.ī abhī kāmil tabāhī

tirā koh-e-sitam hai par ye kam hai

kiyā har qaid se āzād mujh ko

janāb-e-'ishq kā rahm-o-karam hai

makān-o-dar tirī galiyāñ guzar-gāh

'asar' ke vāste ’ain-e-haram hai

KHumar-e-'ishq mujh ko dam-ba-dam hai

mere saqi ka ye lutf-o-karam hai

zara qadmon pe apne dekhiye to

shikasta-dil mera zer-e-qadam hai

na puchho 'ishq ki duniya mein hai kya

yahan bas karb hai hijr-o-alam hai

ye dagh-e-dil bhi degi jaan bhi legi

rah-e-ulfat sarapa pur-sitam hai

basa hai dil mein jab se wo sitamgar

fughan hai dard hai aur chashm-e-nam hai

koi jae to un se lae dil ko

chura ke le gaya mera balam hai

na koi ham-nawa na koi hamdam

tumhaara aasra bas ai sanam hai

bra-e-'ashiqan aatish haramast

kitab-e-'ishq mein naql-o-raqam hai

nahin aai abhi kaamil tabahi

tera koh-e-sitam hai par ye kam hai

kiya har qaid se aazad mujh ko

janab-e-'ishq ka rahm-o-karam hai

makan-o-dar teri galiyan guzar-gah

'asar' ke waste ’ain-e-haram hai