agar dast-e-junon maruf-e-ehsan aur ho jata

agar dast-e-junoñ ma.arūf-e-ehsāñ aur ho jaatā

vqār-e-dāman-e-jaib-o-garebāñ aur ho jaatā

jo masjid se nikal kar aap sū-e-mai-kada aate

janāb-e-shaiḳh lutf-e-dīn-o-īmāñ aur ho jaatā

Tapaktā shām-e-furqat saath ashkoñ ke lahū dil kā

ye ehsāñ terā mujh par chashm-e-giryāñ aur ho jaatā

kamī kyuuñ kī bahut nazdīk thī manzil garebāñ kī

rasā kambaḳht apnā dast-e-imkāñ aur ho jaatā

bayābān-e-mohabbat meñ na hotī kashmakash itnī

agar ābād dīvānoñ se zindāñ aur ho jaatā

rag-e-gardan agar 'mas.ūd' teġh-e-kund se kaTtī

mire qātil kā mujh par bār-e-ehsāñ aur ho jaatā

agar dast-e-junon maruf-e-ehsan aur ho jata

wqar-e-daman-e-jaib-o-gareban aur ho jata

jo masjid se nikal kar aap su-e-mai-kada aate

janab-e-shaiKH lutf-e-din-o-iman aur ho jata

Tapakta sham-e-furqat sath ashkon ke lahu dil ka

ye ehsan tera mujh par chashm-e-giryan aur ho jata

kami kyun ki bahut nazdik thi manzil gareban ki

rasa kambaKHt apna dast-e-imkan aur ho jata

bayaban-e-mohabbat mein na hoti kashmakash itni

agar aabaad diwanon se zindan aur ho jata

rag-e-gardan agar 'masud' tegh-e-kund se kaTti

mere qatil ka mujh par bar-e-ehsan aur ho jata