اگر دست جنوں معروف احساں اور ہو جاتا

اگر دست جنوں معروف احساں اور ہو جاتا

وقار دامن جیب و گریباں اور ہو جاتا

جو مسجد سے نکل کر آپ سوئے مے کدہ آتے

جناب شیخ لطف دین و ایماں اور ہو جاتا

ٹپکتا شام فرقت ساتھ اشکوں کے لہو دل کا

یہ احساں تیرا مجھ پر چشم گریاں اور ہو جاتا

کمی کیوں کی بہت نزدیک تھی منزل گریباں کی

رسا کمبخت اپنا دست امکاں اور ہو جاتا

بیابان محبت میں نہ ہوتی کشمکش اتنی

اگر آباد دیوانوں سے زنداں اور ہو جاتا

رگ گردن اگر مسعودؔ تیغ کند سے کٹتی

مرے قاتل کا مجھ پر بار احساں اور ہو جاتا