kahan ki chaal nikali hai ye kahan ki tarah

kahāñ kī chaal nikālī hai ye kahāñ kī tarah

zamīñ pe chalne lage log āsmāñ kī tarah

tumhīñ batāo ki tāsīr us meñ kyā hogī

jo tum sunoge mirā haal dāstāñ kī tarah

shab-e-visāl bayāñ kyā kareñ shab-e-hijrāñ

vo dard-e-dil ko bhī sunte haiñ dāstāñ kī tarah

har ek baat mirī kaaT dī dam-e-taqdīr

chale na teġh bhī zālim tirī zabāñ kī tarah

falak vo chaal bhī ab chal ki ho mujhe taskīn

ujaaḌ ḳhāna sayyād āshiyāñ kī tarah

ḳhudā hī jaane ki rindoñ ne kyā kahā 'mas.ūd'

janāb-e-shaiḳh ne faryād kī azaañ kī tarah

kahan ki chaal nikali hai ye kahan ki tarah

zamin pe chalne lage log aasman ki tarah

tumhin batao ki tasir us mein kya hogi

jo tum sunoge mera haal dastan ki tarah

shab-e-visal bayan kya karen shab-e-hijran

wo dard-e-dil ko bhi sunte hain dastan ki tarah

har ek baat meri kaT di dam-e-taqdir

chale na tegh bhi zalim teri zaban ki tarah

falak wo chaal bhi ab chal ki ho mujhe taskin

ujaD KHana sayyaad aashiyan ki tarah

KHuda hi jaane ki rindon ne kya kaha 'masud'

janab-e-shaiKH ne faryaad ki azan ki tarah