کہاں کی چال نکالی ہے یہ کہاں کی طرح

کہاں کی چال نکالی ہے یہ کہاں کی طرح

زمیں پہ چلنے لگے لوگ آسماں کی طرح

تمہیں بتاؤ کہ تاثیر اس میں کیا ہوگی

جو تم سنو گے مرا حال داستاں کی طرح

شب وصال بیاں کیا کریں شب ہجراں

وہ درد دل کو بھی سنتے ہیں داستاں کی طرح

ہر ایک بات مری کاٹ دی دم تقدیر

چلے نہ تیغ بھی ظالم تری زباں کی طرح

فلک وہ چال بھی اب چل کہ ہو مجھے تسکین

اجاڑ خانہ صیاد آشیاں کی طرح

خدا ہی جانے کہ رندوں نے کیا کہا مسعودؔ

جناب شیخ نے فریاد کی اذاں کی طرح