wajd ke aalam mein har zarre ko raqsan dekhiye

vajd ke a.alam meñ har zarre ko raqsāñ dekhiye

kis ne chheḌā sāz-e-dil pur-naġhma-e-jāñ dekhiye

fasl-e-gul meñ kaun hai josh-e-junūñ se be-ḳhabar

kis kā dāman dekhiye kis kā garebāñ dekhiye

ek ruḳh ka.aba hai us kā dūsrā hai but-kada

ek hī dil ko batā.e kufr-o-īmāñ dekhiye

do ghaḌī kī zindagī ko maiñ ne samjhā hai hayāt

merī hairānī mirā ḳhvāb-e-pareshāñ dekhiye

e'tibār jazba-e-dil yā ġham-e-afsurdagī

kaun hotā hai shab-e-furqat meñ pursāñ dekhiye

shaad kām-e-zindagī honā koī āsāñ nahīñ

phuul kā khilnā ye aurāq-e-pareshāñ dekhiye

husn hī jab ḳhud-numā ho kyā chhupā.egā hijāb

sham.a ko fānūs ke parde meñ uryāñ dekhiye

thiiñ mire zauq-e-asīrī tak mirī pābandiyāñ

girtī hai ik aah meñ dīvār-e-zindāñ dekhiye

e'timād shauq meñ sub.h-e-vatan se kam nahii.

merī āñkhoñ se mirī shām-e-ġharībāñ dekhiye

maut kī bigḌī sī ik sūrat hai 'hādī' zindagī

raat din kab tak yahī ḳhvāb-e-pareshāñ dekhiye

wajd ke aalam mein har zarre ko raqsan dekhiye

kis ne chheDa saz-e-dil pur-naghma-e-jaan dekhiye

fasl-e-gul mein kaun hai josh-e-junun se be-KHabar

kis ka daman dekhiye kis ka gareban dekhiye

ek ruKH kaba hai us ka dusra hai but-kada

ek hi dil ko batae kufr-o-iman dekhiye

do ghaDi ki zindagi ko main ne samjha hai hayat

meri hairani mera KHwab-e-pareshan dekhiye

e'tibar jazba-e-dil ya gham-e-afsurdagi

kaun hota hai shab-e-furqat mein pursan dekhiye

shad kaam-e-zindagi hona koi aasan nahin

phul ka khilna ye auraq-e-pareshan dekhiye

husn hi jab KHud-numa ho kya chhupaega hijab

shama ko fanus ke parde mein uryan dekhiye

thin mere zauq-e-asiri tak meri pabandiyan

girti hai ek aah mein diwar-e-zindan dekhiye

e'timad shauq mein subh-e-watan se kam nahi

meri aankhon se meri sham-e-ghariban dekhiye

maut ki bigDi si ek surat hai 'hadi' zindagi

raat din kab tak yahi KHwab-e-pareshan dekhiye