mujhe kyun mana karte hain fughan se

mujhe kyuuñ man.a karte haiñ fuġhāñ se

zarā badla to le luuñ āsmāñ se

ilāhī sharh-e-ġham kī sharm rah jaa.e

nazar aate haiñ vo kuchh bad-gumāñ se

nahīñ ma.alūm kyā vo mujh se pūchheñ

nahīñ ma.alūm kyā nikle zabāñ se

mire dil ke havāle ho gayā sab

jo bār-e-ġham na uThā āsmāñ se

mirī pāmāliyoñ kā raaz ākhir

huā ifshā ġhubār-e-kārvāñ se

sarāpā dard huuñ mujh se na pūchho

kahūñ kyā dard uThā hai kahāñ se

dil par zaḳhm kī hālat na pūchho

lahū Tapkegā harf-e-dāstāñ se

vahī ib.hām-e-matlab aaj tak hai

na niklā kaam kuchh sharh-e-bayāñ se

razā-e-dost kā ḳhūgar huuñ 'hādī'

mujhe kyā vāsta sūd-o-ziyāñ se

mujhe kyun mana karte hain fughan se

zara badla to le lun aasman se

ilahi sharh-e-gham ki sharm rah jae

nazar aate hain wo kuchh bad-guman se

nahin malum kya wo mujh se puchhen

nahin malum kya nikle zaban se

mere dil ke hawale ho gaya sab

jo bar-e-gham na uTha aasman se

meri pamaliyon ka raaz aakhir

hua ifsha ghubar-e-karwan se

sarapa dard hun mujh se na puchho

kahun kya dard uTha hai kahan se

dil par zaKHm ki haalat na puchho

lahu Tapkega harf-e-dastan se

wahi ibham-e-matlab aaj tak hai

na nikla kaam kuchh sharh-e-bayan se

raza-e-dost ka KHugar hun 'hadi'

mujhe kya wasta sud-o-ziyan se