مجھے کیوں منع کرتے ہیں فغاں سے

مجھے کیوں منع کرتے ہیں فغاں سے

ذرا بدلہ تو لے لوں آسماں سے

الٰہی شرح غم کی شرم رہ جائے

نظر آتے ہیں وہ کچھ بد گماں سے

نہیں معلوم کیا وہ مجھ سے پوچھیں

نہیں معلوم کیا نکلے زباں سے

مرے دل کے حوالے ہو گیا سب

جو بار غم نہ اٹھا آسماں سے

مری پامالیوں کا راز آخر

ہوا افشا غبار کارواں سے

سراپا درد ہوں مجھ سے نہ پوچھو

کہوں کیا درد اٹھا ہے کہاں سے

دل پر زخم کی حالت نہ پوچھو

لہو ٹپکے گا حرف داستاں سے

وہی ابہام مطلب آج تک ہے

نہ نکلا کام کچھ شرح بیاں سے

رضائے دوست کا خوگر ہوں ہادیؔ

مجھے کیا واسطہ سود و زیاں سے