parde parde mein ye kaisi jalwa-arai hui

parde parde meñ ye kaisī jalva-ārā.ī huī

husn-e-nā-dīda kī ik duniyā tamāshā.ī huī

zarre zarre par jahāñ ke hai vahī chhā.ī huī

aitbār-e-husn-e-kasrat shān-e-yaktā.ī huī

hairat-e-jalva meñ paḌ kar kho ga.ī har aarzū

dushman-e-jān-e-tamannā terī ra.anā.ī huī

jāntā huuñ ḳhuub meñ bāġh-e-tamannā kī bahār

jo kalī aa.ī nazar us meñ vo murjhā.ī huī

kyā batā.ūñ kyā huā anjām zabt-e-shauq kā

dil kī saarī aarzū sirf shakebā.ī huī

kār-farmā husn thā yā ishq kā thā ye qusūr

merī rusvā.ī huī yā terī rusvā.ī huī

haaye vo rañg-e-shikasta jo banā ġhammāz-e-ishq

aah vo hasrat jo dil meñ rah ke rusvā.ī huī

kyā dikhā.ūñ dil kisī ko dil meñ kuchh hālat bhī ho

ik kalī bāġh-e-vafā kī vo bhī murjhā.ī huī

ik nigāh-e-mast saaqī ne kiyā haadī ḳharāb

umr bhar kī tauba sirf bāda-paimā.ī huī

parde parde mein ye kaisi jalwa-arai hui

husn-e-na-dida ki ek duniya tamashai hui

zarre zarre par jahan ke hai wahi chhai hui

aitbar-e-husn-e-kasrat shan-e-yaktai hui

hairat-e-jalwa mein paD kar kho gai har aarzu

dushman-e-jaan-e-tamanna teri ranai hui

jaanta hun KHub mein bagh-e-tamanna ki bahaar

jo kali aai nazar us mein wo murjhai hui

kya bataun kya hua anjam zabt-e-shauq ka

dil ki sari aarzu sirf shakebai hui

kar-farma husn tha ya ishq ka tha ye qusur

meri ruswai hui ya teri ruswai hui

haye wo rang-e-shikasta jo bana ghammaz-e-ishq

aah wo hasrat jo dil mein rah ke ruswai hui

kya dikhaun dil kisi ko dil mein kuchh haalat bhi ho

ek kali bagh-e-wafa ki wo bhi murjhai hui

ek nigah-e-mast saqi ne kiya hadi KHarab

umr bhar ki tauba sirf baada-paimai hui