kahne ko to kya kuchh tere jalwon mein nahin hai

kahne ko to kyā kuchh tere jalvoñ meñ nahīñ hai

be-dard batā merī tamannā bhī kahīñ hai

itnā to samajhtā huuñ ki sajde meñ jabīñ hai

aisā to nahīñ manzil-e-maqsūd yahīñ hai

sajde ke liye kyuuñ merī betāb jabīñ hai

ab tere tasavvur meñ na duniyā hai na diiñ hai

ik jalva-e-rañgīñ ke sivā kuchh bhī nahīñ hai

nādīda-nigāhoñ ko ye duniyā hai vo diiñ hai

har zarre meñ hone kā tire mujh ko yaqīñ hai

duniyā se tū nihāñ hai magar mujh se nahii. hai

tū DhūñD rahā hai haram-o-dair meñ jis ko

zāhid mire TuuTe hue dil meñ vo makīñ hai

allāh re is dīda-e-hairāñ kī musībat

jis ne tujhe dekhā bhī hai dekhā bhī nahīñ hai

itnī bhī na māyūs shab-e-ġham ho kisī kī

marnā bhī mayassar nahīñ jis kā ki yaqīñ hai

kuchh manzileñ ye bhī rah-e-irfāñ meñ thiiñ shāyad

ab dil ko ḳhayāl haram-o-dair nahii. hai

haañ bandagī-e-shauq ke jauhar na miTeñge

har zarre meñ pinhāñ mirī tasvīr-e-jabīñ hai

ye rabt ki be tere nahīñ mujh ko zarā chain

ye zabt ki goyā mujhe ulfat bhī nahīñ hai

ye ba.ad ki hastī tirī ab tak na meñ samjhā

ye qurb ki haa.el rag-e-gardan bhī nahii. hai

fitrat kabhī va.ada-e-shiknī kī bhī hai badlī

tum pūchhte ho mujh se to kahtā huuñ yaqīñ hai

vo pūchhte haiñ mujh se maiñ kyā un ko batā.ūñ

goyā mirī ummīd kī sūrat hī nahīñ hai

sajdoñ kī mire sharm hai allāh tire haath

har zarra zarra us kā talab-gār nahīñ hai

vārastagī-e-dil kā ho kyuuñ kar mujhe da.ava

kis tarah kahūñ terī tamannā bhī nahīñ hai

paivast hai rag rag meñ mirī terī tamannā

tū haath jahāñ rakh de terā dard vahīñ hai

ma.alūm nahīñ ab bhī hijābāt haiñ kitne

'hādī' tujhe kyā jalva-e-jānāñ ko yaqīñ hai

kahne ko to kya kuchh tere jalwon mein nahin hai

be-dard bata meri tamanna bhi kahin hai

itna to samajhta hun ki sajde mein jabin hai

aisa to nahin manzil-e-maqsud yahin hai

sajde ke liye kyun meri betab jabin hai

ab tere tasawwur mein na duniya hai na din hai

ek jalwa-e-rangin ke siwa kuchh bhi nahin hai

nadida-nigahon ko ye duniya hai wo din hai

har zarre mein hone ka tere mujh ko yaqin hai

duniya se tu nihan hai magar mujh se nahi hai

tu DhunD raha hai haram-o-dair mein jis ko

zahid mere TuTe hue dil mein wo makin hai

allah re is dida-e-hairan ki musibat

jis ne tujhe dekha bhi hai dekha bhi nahin hai

itni bhi na mayus shab-e-gham ho kisi ki

marna bhi mayassar nahin jis ka ki yaqin hai

kuchh manzilen ye bhi rah-e-irfan mein thin shayad

ab dil ko KHayal haram-o-dair nahi hai

han bandagi-e-shauq ke jauhar na miTenge

har zarre mein pinhan meri taswir-e-jabin hai

ye rabt ki be tere nahin mujh ko zara chain

ye zabt ki goya mujhe ulfat bhi nahin hai

ye baad ki hasti teri ab tak na mein samjha

ye qurb ki hael rag-e-gardan bhi nahi hai

fitrat kabhi wada-e-shikni ki bhi hai badli

tum puchhte ho mujh se to kahta hun yaqin hai

wo puchhte hain mujh se main kya un ko bataun

goya meri ummid ki surat hi nahin hai

sajdon ki mere sharm hai allah tere hath

har zarra zarra us ka talab-gar nahin hai

warastagi-e-dil ka ho kyun kar mujhe dawa

kis tarah kahun teri tamanna bhi nahin hai

paiwast hai rag rag mein meri teri tamanna

tu hath jahan rakh de tera dard wahin hai

malum nahin ab bhi hijabaat hain kitne

'hadi' tujhe kya jalwa-e-jaanan ko yaqin hai