iztirab-e-shauq ki hangama-arai na puchh

iztirāb-e-shauq kī hañgāma-ārā.ī na pūchh

rañg laa.ī hai jo merī nā-shakī-bā.ī na pūchh

ho ga.ī pā-e-talab ko ab to tujh se rasm-o-rāh

merī manzil hai kahāñ ai shauq-e-sehrā.ī na pūchh

husn ko raunaq diye jaanā ba-hadd-e-tamkanat

mere dil kā haal ai rasm-e-ḳhud-ārā.ī na pūchh

kab Thahar saktā thā is rū meñ bhalā pā-e-sabāt

pahle thā meñ kis jagah ai chashm-e-dariyā.ī na pūchh

sabr aatā hai na qaabū hai dil-e-betāb par

aaj kis mushkil meñ hai terā tamannā.ī na pūchh

kaun lamha us kā thā hañgāma-e-mahshar se kam

vāqi.āt-e-iztirāb shām-e-tanhā.ī na pūchh

karle andāzā ḳhud apne dīda-hā-e-mast se

mujh se saaqī merā zauq-e-bāda-paimā.ī na pūchh

ab nahīñ tere tasavvur ko bhī kuchh mujh se lagāo

jis kī duniyā ho añdherī us kī tanhā.ī na pūchh

hai ajab pur-lutf husn-o-ishq kā ye ma.arka

kis qadr dil-kash hai 'hādī' shān-e-rusvā.ī na pūchh

iztirab-e-shauq ki hangama-arai na puchh

rang lai hai jo meri na-shaki-bai na puchh

ho gai pa-e-talab ko ab to tujh se rasm-o-rah

meri manzil hai kahan ai shauq-e-sehrai na puchh

husn ko raunaq diye jaana ba-hadd-e-tamkanat

mere dil ka haal ai rasm-e-KHud-arai na puchh

kab Thahar sakta tha is ru mein bhala pa-e-sabaat

pahle tha mein kis jagah ai chashm-e-dariyai na puchh

sabr aata hai na qabu hai dil-e-betab par

aaj kis mushkil mein hai tera tamannai na puchh

kaun lamha us ka tha hangama-e-mahshar se kam

waqiat-e-iztirab sham-e-tanhai na puchh

karle andaza KHud apne dida-ha-e-mast se

mujh se saqi mera zauq-e-baada-paimai na puchh

ab nahin tere tasawwur ko bhi kuchh mujh se lagao

jis ki duniya ho andheri us ki tanhai na puchh

hai ajab pur-lutf husn-o-ishq ka ye marka

kis qadr dil-kash hai 'hadi' shan-e-ruswai na puchh