rakkhe qabu jo apne ji pe koi

rakkhe qaabū jo apne jī pe koī

kyuuñ hañse merī be-ḳhudī pe koī

apne hī dil pe jab nahīñ qaabū

kyā bharosā kare kisī pe koī

hāsil-e-zīst yaad maut kī hai

kahīñ martā hai zindagī pe koī

aa.e maqtal meñ muskurāte hue

mar miTā un kī sādgī pe koī

merī qabr aur aap Thukrā.eñ

kahīñ kuchh kah na de usī pe koī

apne bas meñ na ho jab apnā dil

rakkhe ilzām kyuuñ kisī pe koī

teġh vo tolte haiñ hañs-hañs kar

jaan de de na us hañsī pe koī

dār-e-fānī meñ kyā kare 'qudsī'

naaz do din kī zindagī pe koī

rakkhe qabu jo apne ji pe koi

kyun hanse meri be-KHudi pe koi

apne hi dil pe jab nahin qabu

kya bharosa kare kisi pe koi

hasil-e-zist yaad maut ki hai

kahin marta hai zindagi pe koi

aae maqtal mein muskuraate hue

mar miTa un ki sadgi pe koi

meri qabr aur aap Thukraen

kahin kuchh kah na de usi pe koi

apne bas mein na ho jab apna dil

rakkhe ilzam kyun kisi pe koi

tegh wo tolte hain hans-hans kar

jaan de de na us hansi pe koi

dar-e-fani mein kya kare 'qudsi'

naz do din ki zindagi pe koi