رکھے قابو جو اپنے جی پہ کوئی

رکھے قابو جو اپنے جی پہ کوئی

کیوں ہنسے میری بے خودی پہ کوئی

اپنے ہی دل پہ جب نہیں قابو

کیا بھروسا کرے کسی پہ کوئی

حاصل زیست یاد موت کی ہے

کہیں مرتا ہے زندگی پہ کوئی

آئے مقتل میں مسکراتے ہوئے

مر مٹا ان کی سادگی پہ کوئی

میری قبر اور آپ ٹھکرائیں

کہیں کچھ کہہ نہ دے اسی پہ کوئی

اپنے بس میں نہ ہو جب اپنا دل

رکھے الزام کیوں کسی پہ کوئی

تیغ وہ تولتے ہیں ہنس ہنس کر

جان دے دے نہ اس ہنسی پہ کوئی

دار فانی میں کیا کرے قدسیؔ

ناز دو دن کی زندگی پہ کوئی