tu hi hai meri ye bud-o-baqa tu aur nahin main aur nahin

tū hī hai mirī ye būd-o-baqā tū aur nahīñ maiñ aur nahīñ

dekhā jo apne ko tū hī milā tū aur nahīñ maiñ aur nahīñ

tū hī adam kā thā parda-nashīñ mire dil ke makāñ kā hai tū hī makīñ

mirī hastī hai sab ye zuhūr tirā tū aur nahīñ maiñ aur nahīñ

mire hosh-rubā ne hai fazl kiyā mujhe rāz-e-ḳhudā.ī apnā diyā

mirī ruuh meñ ruuh milā ke kahā tū aur nahīñ maiñ aur nahīñ

kahtā hai ye mujh se merā sanam ki haiñ ek hī ye donoñ hudūs-o-qidam

kuchh farq nahīñ is meñ hai zarā tū aur nahīñ maiñ aur nahīñ

'Mardān-Safī' mirā māh-e-laqā hai merī hī shakl meñ jalva-numā

mujh se ye kahtā hai kah de khulā tū aur nahīñ maiñ aur nahīñ

tu hi hai meri ye bud-o-baqa tu aur nahin main aur nahin

dekha jo apne ko tu hi mila tu aur nahin main aur nahin

tu hi adam ka tha parda-nashin mere dil ke makan ka hai tu hi makin

meri hasti hai sab ye zuhur tera tu aur nahin main aur nahin

mere hosh-ruba ne hai fazl kiya mujhe raaz-e-KHudai apna diya

meri ruh mein ruh mila ke kaha tu aur nahin main aur nahin

kahta hai ye mujh se mera sanam ki hain ek hi ye donon hudus-o-qidam

kuchh farq nahin is mein hai zara tu aur nahin main aur nahin

'Mardan-Safi' mera mah-e-laqa hai meri hi shakl mein jalwa-numa

mujh se ye kahta hai kah de khula tu aur nahin main aur nahin