tab har ek aankh kab lati hai tere nur ki

taab har ik aañkh kab laatī hai tere nuur kī

dīda-e-mūsā ho to dekhe tajallī tuur kī

uuprī tujh ko ḳhudā ne dī hai sūrat nuur kī

terī eḌī par karūñ sadqe meñ choTī huur kī

bār-e-isyāñ se ḳhamīda ho gayā hai qad-e-rāst

bojh uThāne se kamar jhuk jaatī hai mazdūr kī

kis qadar tujh ko hasīñ paidā kiyā allāh ne

o pari tujh par na kyūñ-kar raal Tapke huur kī

mai chhuTe gī mujh se kyūñkar mai kā hai merā ḳhamīr

mujh ko ghuTTī meñ pilā.ī hai sharāb añgūr kī

ḳhat ke aate hī diyā āshiq ko bosa yaar ne

shaam kā vaqt aayā ujrat mil ga.ī mazdūr kī

dāva-e-bātil ulūhiyat kā thā fir.aun ko

phir ḳhudāvandī kahāñ jab bandagī manzūr kī

dil na de apnā parī-zādoñ pe dīvāna na ho

dev kī ḳhaslat hai un meñ go hai sūrat huur kī

jalva-e-dīdar kā ik shoḳh ke kushta huuñ 'rind'

merī turbat par lagānā lauh sañg-e-tūr kī

tab har ek aankh kab lati hai tere nur ki

dida-e-musa ho to dekhe tajalli tur ki

upri tujh ko KHuda ne di hai surat nur ki

teri eDi par karun sadqe mein choTi hur ki

bar-e-isyan se KHamida ho gaya hai qad-e-rast

bojh uThane se kamar jhuk jati hai mazdur ki

kis qadar tujh ko hasin paida kiya allah ne

o pari tujh par na kyun-kar ral Tapke hur ki

mai chhuTe gi mujh se kyunkar mai ka hai mera KHamir

mujh ko ghuTTi mein pilai hai sharab angur ki

KHat ke aate hi diya aashiq ko bosa yar ne

sham ka waqt aaya ujrat mil gai mazdur ki

dawa-e-baatil uluhiyat ka tha firaun ko

phir KHudawandi kahan jab bandagi manzur ki

dil na de apna pari-zadon pe diwana na ho

dew ki KHaslat hai un mein go hai surat hur ki

jalwa-e-didar ka ek shoKH ke kushta hun 'rind'

meri turbat par lagana lauh sang-e-tur ki